ابوظبی کے نائب حکمراں اور قومی سلامتی کے مشیر شیخ طحنون بن زاید النہیان نے امریکی انفارمیشن ٹیکنالوجی گروپ گوگل اور اس کی پیرنٹ کمپنی الفا بیٹ کی چیف ایگزیکٹیو آفیسر (سی ای او ) روتھ پوراٹ سے ملاقات کی ہے۔
یہ ملاقات ٹیکنالوجی اور مصنوعی ذہانت کے شعبے میں تعاون کو فروغ دینے کے لیے ہوئی۔
شیخ طحنون نے ملاقات میں متحدہ عرب امارات کے ڈیجیٹل منصوبوں سے آگاہ کیا جن میں 2027ء تک ابوظبی حکومت کو مکمل طور پر آرٹیفیشل انٹیلیجنس (مصنوعی ذہانت) پر منتقل کرنے کا عزم ظاہر کیا۔
شیخ طحنون نے اپنے ایکس (سابقہ ٹویٹر) اکاؤنٹ پر کہا ہے کہ ہم نے جدید ٹیکنالوجیز اور مصنوعی ذہانت کے شعبوں میں تعاون کو مزید وسعت دینے پر تبادلۂ خیال کیا، جو متحدہ عرب امارات کی عالمی قیادت کے عزم کا حصہ ہے۔
شیخ طحنون نے آرٹیفیشل انٹیلیجنس اور کمپیوٹیشنل انفرااسٹرکچر کے میدان میں مشترکہ مواقع پر بھی تبادلۂ خیال کیا جس کے بارے میں دعویٰ کیا جا رہا ہے کہ نئی ٹیکنالوجی عالمی سطح پر ترقی اور معیارِ زندگی کو بہتر بنانے میں مدد فراہم کرے گی۔
روتھ پوراٹ نے متحدہ عرب امارات کی کوششوں کی تعریف کی جو جدید ٹیکنالوجیز کے ذریعے پائیدار ترقی کو ممکن بنانے کے لیے کی جا رہی ہیں۔
یہ ملاقات ایسے وقت میں ہوئی جب متحدہ عرب امارات اور امریکا چپس کی برآمدات پر نئی پالیسی کے تناظر میں مصنوعی ذہانت کے شعبے میں تعاون کو بڑھانے پر کام کر رہے ہیں۔
