معروف عالم دین مفتی تقی عثمانی نے کہا ہے کہ پاکستان کو 5 گنا بڑی فوج پر فتح مبین ملی ہے، ہم اللّٰہ کے شکر گزار ہیں کہ اس نے ہماری لاج رکھی۔
کراچی میں کانفرنس سے خطاب میں مفتی تقی عثمانی نے کہا کہ آج ہماری افواج نے ہمیں ایک بار پھر خوشی کا دن دکھایا ہے، پاکستان کا ہر فرد خوشی کے جذبات سے لبریز ہے۔
انہوں نےکہا کہ فتح عظیم پر شکر ادا کرنے کے لیے مزار قائد کے پہلو میں جمع ہیں، مسلمانوں کی فتح و نصرت کی خبر کے لیے کان بے تاب رہتے تھے۔
مفتی تقی عثمانی نے مزید کہا کہ پاکستان کی افواج نے ساری دنیا میں اپنی برتری کا سکہ جمایا، پاکستانی قوم ناقابل شکست ہے، 5 گنا بڑی فوج پر فتح مبین ملی ہے۔
اُن کا کہنا تھا کہ 1965ء میں بزدل دشمن کو شکست دی تھی اور آج بھی ہم سرخرو ہوئے، ہم اللہ کے شکر گزار ہیں کہ اس نے ہماری لاج رکھی۔
مفتی تقی عثمانی نے یہ بھی کہا کہ پاکستان نے دشمن کے شہریوں پر نہیں فوجی تنصیبات پر حملہ کیا، آج تجدید عہد کا دن ہے، اس ملک کو اسلام کے تابع بنائیں گے۔
انہوں نے کہا کہ عزم کرتے ہیں کہ ملک کی خدمت کےلیے جان و مال کی قربانی دیں گے، اس ملک کو کرپشن اور رشوت سے پاک کریں گے، فروعی اختلافات کو خیر باد کہہ کر افواج پاکستان کی پشت پر کھڑے رہیں گے۔
