(24 نیوز)جنگ بندی کے اعلان کے بعد بنگلہ دیش کرکٹ ٹیم کے دورہ پاکستان کا امکان روشن ہوگیا، بنگلہ دیشی کرکٹ بورڈ نے دورہ کے لیے گرین سگنل دےدیا۔
پاکستان کے خلاف ٹی ٹونٹی سیریز کے5 میچز 25 مئی سے 3 جون تک فیصل آباد میں کھیلے جانے ہیں۔
اس سے قبل بنگلہ دیشی ٹیم شارجہ کرکٹ سٹیڈیم میں متحدہ عرب امارات کے خلاف دو ٹی ٹونٹی میچز 17 اور 19 مئی کو کھیلے گی۔
قبل ازیں بنگلہ دیشی کرکٹ بورڈ نے اپنے اعلامیہ میں کہا تھا کہ آئندہ دورہ پاکستان کے حوالے سے بات چیت جاری ہے۔
کھلاڑیوں اور معاون عملے کی حفاظت اور تحفظ بورڈ کی اولین ترجیح ہے اوردورے سے متعلق تمام فیصلے پاکستان کی موجودہ صورتحال کو مدنظر رکھتے ہوئے کیے جائیں گے۔
ذرائع کے مطابق بنگلہ دیشی کرکٹ بورڈ نے نے پاکستان اور بھارت کے درمیان سرحدی کشیدگی کے بعد آئی پی ایل اور پی ایس ایل کے التوا کو دیکھتے ہوئے دورہ کا فیصلہ موخر کردیا تھا۔
بنگلہ دیشی بورڈ کے ڈائریکٹرز نے ہفتہ کو شیر بنگلہ نیشنل کرکٹ سٹیڈیم میں صورتحال پر غور کے بعد میزبان کرکٹ بورڈ سے تبادلہ خیال کیا۔
دریں اثنا پی سی بی کے ترجمان نے دورہ کے حوالے سے دونوں ممالک کے بورڈز کے درمیان رابطہ کی تصدیق کی۔
انہوں نے کہا کہ جنگ بندی کے اعلان کے بعد سامنے آنے والی صورتحال کے مطابق فیصلہ سامنے آئے گا۔
ابتدائی شیڈول کے مطابق بنگلہ دیشی کرکٹ ٹیم کی 21 مئی کو پاکستان آمد طے ہے۔
