اسلام آباد:
تجزیہ کار شہباز رانا کا کہنا ہے کہ ڈی جی آئی ایس پی آر نے کہا تھا کہ جب پاکستان جواب دے گا تو دنیا دیکھے گی اور دنیا بتائے گی وہی ہوا۔
ایکسپریس نیوز کے کنٹرول روم میں گفتگو کرتے ہوئے انھوں نے کہا کہ یہ پاکستان کیلیے مکمل کامیابی ہے، ڈپلومیٹک فرنٹ پر اس بار دنیا بھارت کے ساتھ نہیں تھی، پاکستان کے ساتھ تھی، بھارت ایک نیوکلیئر پاور پر اس چیز کا الزام لگا رہا تھا کہ جس کا اس کے پاس کوئی ثبوت ہی نہیں تھا، اگر کوئی ایویڈنس ہوتا تو شاید دنیا کا اس پر جو موقف ہوتا وہ اس سے بہت مختلف ہوتا۔
تجزیہ کار کامران یوسف نے کہا کہ اگر آپ پوری دنیا کا میڈیا دیکھیں جو نیوٹرل آبزرورز ہیں، جو انٹرنیشنل آبزرورز ہیں، مثلاًجو بی بی سی نے کمنٹری کی ہے کہ اس میں کلیئرلی پاکستان آپ کو ونر نظر آتا ہے۔
پاکستان نے جو جواب دیا ہے ، میرے خیال میں وہ تاریخ کی کتابوں میں لکھا جائے گا، یہ بہت غیر معمولی کامیابی ہے۔
سیکیورٹی امور کے ماہر(ر)ایئر مارشل زاہد محمود نے کہا کہ یہ کوئی نئی بات نہیں ہے، بھارت اپنے جنگی جنون میں یہ کام پہلے بھی کئی مرتبہ کر چکا ہے، سب سے پہلے بنیادی بات یہ ہے کہ یہ جو خطہ ہے اور یہ دنیا یہ پاک بھارت جنگ کی متحمل نہیں ہو سکتی۔ انھوں نے جو نہتے اور معصوم بچوں پر حملہ کیایہ ہم بھول نہیں سکتے۔
سیکیورٹی امور کے ماہر ڈاکٹر قمر چیمہ نے کہا کہ آپ کو یاد ہو گا ڈپلومیٹیکلی ڈونلڈ ٹرمپ جب پہلے بھی صدر تھے تو انڈیا نے کیٹیگوریلی کہا تھا کہ ہمیں کسی تھرڈ پارٹی کی ضرورت نہیں ہے، ہمیں کسی میڈی ایشن کی ضرورت نہیں ہے۔ تو اب کیا ضرورت پڑی کہ انڈیا کو امریکا سے کہنا پڑا کہ ہماری میڈی ایشن کروائیں، یا ہمارا یہ سیز فائر کروائیں۔
