واشنگٹن/نئی دہلی: بھارت اور پاکستان کے درمیان دو دہائیوں کی بدترین کشیدگی کے دوران، سوشل میڈیا کمپنی میٹا نے بھارت میں معروف مسلم نیوز پیج “@Muslim” کا انسٹاگرام اکاؤنٹ بلاک کر دیا، جس کے 6.7 ملین فالوورز ہیں۔
اکاؤنٹ کے بانی اور چیف ایڈیٹر، امیر الخطاطبہ نے اس اقدام کو “سینسرشپ” قرار دیتے ہوئے کہا کہ بھارتی حکومت کی قانونی درخواست پر اکاؤنٹ کی رسائی محدود کی گئی۔
بھارتی صارفین کو انسٹاگرام پر یہ پیغام موصول ہو رہا ہے”اکاؤنٹ بھارت میں دستیاب نہیں ہے کیونکہ ہم نے مقامی قانون کے تحت اسے محدود کیا ہے۔”
میٹا نے اس معاملے پر کوئی باضابطہ تبصرہ نہیں کیا، تاہم اس کے ترجمان نے صرف اتنا کہا کہ کمپنی دنیا بھر میں مقامی قوانین کے تحت بعض مواد کو محدود کرتی ہے۔
یہ اقدام ایسے وقت میں سامنے آیا ہے جب پاکستان کے سابق وزیراعظم عمران خان، کرکٹرز بابراعظم، محمد رضوان، اور فنکاروں فواد خان و عاطف اسلم سمیت کئی معروف پاکستانی شخصیات کے سوشل میڈیا اکاؤنٹس بھارت میں بلاک کیے جا چکے ہیں۔
امیر الخطاطبہ نے اپنے بھارتی فالورز سے معذرت کرتے ہوئے کہا، “جب حکومتیں اور پلیٹ فارمز میڈیا کو خاموش کروانے کی کوشش کرتے ہیں، تو ہمیں یقین ہو جاتا ہے کہ ہم اپنا کام صحیح کر رہے ہیں۔ ہم انصاف اور سچ کے لیے آواز بلند کرتے رہیں گے۔”
