ڈائریکٹر جنرل (ڈی جی) انٹر سروسز پبلک ریلیشنز (آئی ایس پی آر) لیفٹننٹ جنرل احمد شریف چوہدری کا کہنا ہے کہ پاکستان جب مارے گا تب پوری دنیا جان جائے گی۔
اسلام آباد میں نائب وزیراعظم و وزیر خارجہ اسحاق ڈار اور ڈی جی آئی ایس پی آر نے مشترکہ پریس کانفرنس کی۔
ڈی جی آئی ایس پی آر نے کہا کہ بھارت کی طرف سے کسی بھی قسم کے حملے کی مکمل نگرانی کی جا رہی ہے، گرائے گئے بھارتی ڈرونز کا فرانزک معائنہ کیا جا رہا ہے، بھارتی میڈیا پر جعلی تصاویر اور ویڈیوز چلائی جا رہی ہیں۔
ترجمان پاک فوج نے کہا کہ امرتسر میں بھارتی تنصیبات کو بھارتی میزائلوں نے ہی نشانہ بنایا، بھارت کا پاکستان پر ڈرون حملوں کا الزام جھوٹ پر مبنی ہے۔
انہوں نے کہا کہ بھارت کے 29 ڈرونز گرائے گئے، بھارت کے ڈرونز حملوں میں 3 شہادتیں ہوئی ہیں، چار افراد زخمی ہیں، یہ چھوٹے ڈرونز تھے ان کا خیال تھا کہ یہ نظر میں نہیں آئیں گے، پاکستان نے حملہ کیا تو اس کی گونج پوری دنیا میں سنائی دے گی۔
ڈی جی آئی ایس پی آر نے مزید کہا کہ بھارت کی میڈیا میں انجینئرڈ وار ہسٹریا نظرآرہی ہے، ہم ایمان کی قوت سے اتنے عرصے سے فتنہ الخوارج اور دہشتگردوں سے جنگ لڑ رہے ہیں۔
اس موقع پر وزیر خارجہ اسحاق ڈار کا کہنا ہے کہ پاکستان نے بھارتی پنجاب میں کسی بھی شہری علاقے میں کارروائی نہیں کی، ایک ذمہ دار ملک کے طور پر پاکستان نے ہر ممکن اسٹریٹیجک احتیاط کا مظاہرہ کیا ہے۔
اسحاق ڈار نے کہا کہ پاکستان بھارتی جارحیت کا اپنے طے کردہ وقت اور مقام پر جواب دینے کا حق محفوظ رکھتا ہے، بھارتی ڈرونز نے لاہور میں فوجی تنصیب کو نشانہ بنانے کی کوشش کی، بھارت نے کوئی ایڈونچر کیا تو ہماری آرمی، نیوی اور فضائیہ الرٹ ہیں۔
وزیر خارجہ اسحاق ڈار نے کہا کہ بھارت کے کئی ڈرونز نے پاکستان کی حدود کی خلاف ورزی کی، بھارت کے ڈرون نے لاہور میں فوجی تنصیب کو نشانہ بنانے کی کوشش کی، پاکستان کی مسلح افواج نے بھارت کے 5 جنگی طیاروں کو گرایا۔
اسحاق ڈار نے کہا کہ پاکستان اپنے شہریوں کی حفاظت کے لیے پرعزم ہے، پاکستان نے بھارت کے جنگی طیارے گرائے یہ شاید بھارت سے ہضم نہیں ہورہا، وہ اپنی خفت مٹانے کے لیے یہ حرکتیں کر رہا ہے، راولپنڈی کرکٹ اسٹیڈیم پر حملہ کرکے بھارت نے پاکستانی اور غیر ملکی کھلاڑیوں کی جان خطرے میں ڈالی۔
نائب وزیراعظم اسحاق ڈار نے کہا کہ پاکستانی بہن بھائیوں کوئی گھبرانے کی ضرورت نہیں، مسلح افواج دفاع کیلئے پرعزم ہیں، پاک فضائیہ کے شاہینوں نے کامیابی سے 80 بھارتی جنگی طیاروں کا مقابلہ کیا۔
