گجرانوالہ:
دیرینہ دشمنی کی بنیاد پر فائرنگ کرکے 5 افراد کو قتل کردیا گیا جب کہ بعد میں پولیس مقابلے کے دوران ملزم بھی پولیس کی فائرنگ سے ہلاک ہوگیا۔
ایکسپریس نیوز کے مطابق گجرانوالہ کے علاقے تھانہ تتلے عالی کی حدود اڑتالی ورکاں میں دیرینہ عداوت نے خونیں رُخ اختیار کر لیا، جہاں ملزم عمران شیرو نے معمولی تلخ کلامی کے بعد فائرنگ کر دی، جس کے نتیجے میں 5 افراد جاں بحق اور ایک شدید زخمی ہو گیا۔
فائرنگ میں جاں بحق ہونے والوں میں 28 سالہ عثمان ورک، 28 سالہ وقاص، 40 سالہ عمران عاشق، 18 سالہ عمر اور افضل شامل ہیں۔ علاوہ ازیں زخمی ہونے والے شخص کی شناخت گن مین سلمان کے طور پر ہوئی ہے جو شدید زخمی حالت میں اسپتال منتقل کیا گیا۔
پولیس کے مطابق مرنے والوں میں عثمان ورک کا ایک گن مین اور قریبی دوست بھی شامل ہیں۔
بعد ازاں تتلے عالی کے علاقے میں 5 افراد کا قاتل ملزم عمران شیرو پولیس مقابلے میں ہلاک ہوگیا جب کہ اس کا ساتھی زخمی حالت میں گرفتار کرلیا گیا۔ مقابلے کے دوران ایس ایچ او تتلے عالی صفدر عطا بھٹی بھی گولی لگنے سے زخمی ہو گئے۔
پولیس کے مطابق ملزم قتل کے بعد اپنے ساتھی کے ساتھ قریبی اسکول میں چھپا ہوا تھا، جس نے پولیس کو دیکھتے ہی فائرنگ کردی اور اس دوران دوطرفہ فائرنگ کے دوران ملزم مارا گیا۔
واقعے کے بعد علاقے میں خوف و ہراس پھیل گیا۔ ایس پی صدر سمیت پولیس کی بھاری نفری موقع پر پہنچی اور لاشوں و زخمی کو قریبی اسپتال منتقل کیا گیا۔
قبل ازیں واقعے کا نوٹس لیتے ہوئے آئی جی پنجاب ڈاکٹر عثمان انور نے آر پی او گجرانوالہ سے فوری رپورٹ طلب کی اور سی پی او گجرانوالہ کو ملزمان کی فوری گرفتاری کا حکم دیا تھا۔
