فرانس کے ایک اعلیٰ انٹیلیجنس اہلکار نے تصدیق کردی ہے کہ پاکستان نے ایک رافیل لڑاکا طیارہ مار گرایا ہے۔
امریکی میڈیا کے مطابق فرانسیسی اہلکار نے سی این این کو بتایا کہ فرانسیسی حکام یہ جاننے کی کوشش کر رہے ہیں کہ آیا پاکستان نے واقعی ایک سے زائد رافیل طیارے مار گرائے ہیں۔
امریکی ٹی وی سی این این سے بات کرتے ہوئے ایک اعلیٰ فرانسیسی انٹیلی جنس اہلکار نے تصدیق کی ہے کہ بھارتی فضائیہ کا ایک رافیل طیارہ پاکستانی کارروائی میں تباہ ہوا ہے جو کہ جنگ میں اس طیارے کے تباہ ہونے کا پہلا واقعہ ہوگا۔
فرانسیسی حکام اس بات کی تحقیقات کر رہے ہیں کہ آیا ایک سے زائد رافیل طیارے مار گرائے گئے ہیں، جبکہ بھارتی حکومت کی جانب سے تاحال اس دعوے پر کوئی باضابطہ ردعمل سامنے نہیں آیا۔
دریں اثنا رافیل طیارہ بنانے والی کمپنی نے سی این این کی جانب سے تبصرے کی درخواست کا جواب نہیں دیا۔
یاد رہے کہ رافیل طیارہ ایک 10 ٹن وزنی، دو انجنوں والا کثیر المقاصد جنگی طیارہ ہے، جو فضا سے فضا میں اور فضا سے زمین پر مار کرنے والے جدید ہتھیاروں سے لیس ہوتا ہے۔
بھارت نے گزشتہ دنوں فرانس سے 36 رافیل طیارے خریدے تھے، جو اس کی فضائیہ میں شامل ہوئے تھے۔
واضح رہے کہ بھارت کی جانب سے گزشتہ رات پاکستان پر حملہ کیا گیا جس کا پاکستان نے بروقت اور موثر جواب دے دیا اور رات کی تاریکی میں میزائل حملوں میں شہریوں کو نشانہ بنانے والے بھارت کے 5 جنگی طیارے مار گرائے ہیں۔
بھارتی جارحیت پر بریفنگ میں ڈی جی آئی ایس پی آر نے خبردار کیا کہ پاکستان نے صرف اپنے دفاع کا حق استعمال کیا، بھارتی جارحیت کا جواب اپنے منتخب وقت، مقام، اور طریقے سے دیا جائے گا۔
پاک فوج کی جوابی کارروائی میں برنالہ، شکر گڑھ اور کوٹلی سیکٹر میں بھارتی ڈرون اور متعدد کواڈ کواپٹر بھی تباہ کردیے گئے، ایل او سی پر بھی بھارتی اشتعال انگیزی کا جواب دیا گیا۔
بھارتی فوج کا انفنٹری بریگیڈ ہیڈ کوارٹر اور ایک بٹالین ہیڈ کوارٹر سمیت متعدد پوسٹیں تباہ کردی گئیں، بھاری نقصان اٹھانے کے بعد بھارت نے ایل او سی پر جورا، چکوٹھی اور وادی لیپا سیکٹر کی چیک پوسٹوں پر سفید جھنڈا لہرا کر شکست تسلیم کرلی۔
