معروف اداکارہ، میزبان اور سابق ماڈل عنبر خان نے بالآخر اپنی زندگی کے سب سے مشکل اور حساس باب پر لب کشائی کر دی۔
نجی ٹی وی کے مارننگ شو میں گفتگو کرتے ہوئے عنبر خان نے اپنی زہر آلود اور ذہنی اذیت بھری شادی سے متعلق کئی اہم انکشافات کیے۔
عنبر خان نے کہا کہ جب میری شادی ہوئی تو میں بہت کم عمر تھی، اگر اچھا شوہر مل جائے تو وہ قسمت کی بات ہے، میرے سسرال والے تو ٹھیک تھے، مگر شوہر کے ساتھ زندگی اذیت ناک تھی، میں ہر بات مانتی تھی، اپنی خودداری کو نظرانداز کر دیتی تھی اور کبھی آواز نہیں اٹھائی، میرے والدین تک حیران ہوتے تھے کہ میں ایسی کیوں بن گئی ہوں۔
اداکارہ نے بتایا کہ میں دوسروں کےلیے تو آواز اٹھاتی تھیں، مگر خود کےلیے ہمت نہ کر سکی، سسرال میں نند کے لیے بولتی تھی، مگر جب بات خود پر آتی، تو نہ ہوشیاری دکھائی نہ بہادری، میری ماں نے مجھے ہمت دی، مگر شوہر کے سامنے کبھی بول نہ سکی، وہ ایک بگاڑا ہوا انسان تھا، جو صرف اپنی ہی مانتا تھا۔
عنبر خان نے انتہائی کرب ناک انداز میں بتایا کہ میں نے ذہنی و جسمانی تشدد بھی برداشت کیا لیکن اب برداشت ختم ہو چکی ہے، میرے والد ہمیشہ پریشان رہتے تھے، میں بہت کچھ سہہ چکی ہوں، لیکن ہر چیز کی ایک حد ہوتی ہے، اب زندگی میں اس مقام پر ہوں کہ کسی کا ظلم مزید برداشت نہیں کروں گی۔
