چیئرمین فیڈرل بورڈ آف ریونیو (ایف بی آر) راشد محمود لنگڑیال نے کہا ہے کہ نئے بجٹ میں تنخواہ دار طبقے کو ریلیف دیے پر غور کررہے ہیں۔
قومی اسمبلی کی قائمہ کمیٹی خزانہ کو دی گئی بریفنگ میں چیئرمین ایف بی آر نے کہا کہ اگلے مالی سال 26-2025 کا بجٹ اہداف کے لحاظ سے ایک مشکل بجٹ ہوگا۔
انہوں نے کہا کہ اس سے اگلے سال کا بجٹ بھی سخت ہوگا، آئی ایم ایف کی وجہ سے ٹیکس ریٹ میں کمی آسان نہیں ہوگی۔
راشد محمود لنگڑیال نے مزید کہا کہ نئے بجٹ میں تنخواہ دار طبقے کو ریلیف دینے پر غور کر رہے ہیں، تنخواہ دار طبقے کے ریلیف کےلیے پوری کوشش کی جائے گی۔
اُن کا کہنا تھا کہ وزارت خزانہ میں ٹیکس پالیسی یونٹ ابھی مکمل فعال نہیں ہوا، نئے بجٹ کےلیے ٹیکس پالیسی کی تشکیل میں وزارت خزانہ کی مدد کر رہے ہیں۔
چیئرمین ایف بی آرنے یہ بھی کہا کہ ڈیری مصنوعات پر ٹیکس کے بارے میں تجاویز پر غور کیا جائے گا۔
