بالی ووڈ انڈسٹری کی معروف گلوکارہ نیہا ککڑ کے میلبرن میں کنسرٹ کے دوران تاخیر سے پہنچنے اور پھوٹ پھوٹ کے رونے پر شو کے منتظمین نے خاموشی توڑی دی۔
یاد رہے کہ گزشتہ ماہ نیہا ککڑ میلبرن کے ایک کنسرٹ میں تین گھنٹے تاخیر سے پہنچنے کی وجہ سے سرخیوں میں آگئی تھیں۔
نیہا ککڑ کی کئی ویڈیوز آن لائن سامنے آئیں تھیں جن میں گلوکارہ کو اسٹیج پر پھوٹ پھوٹ کر روتے اور شائقین سے تاخیر سے پہنچنے پر معافی مانتے دیکھا گیا تھا۔
بعدازاں نیہا نے شو کے منتظمین پر ان کے پیسے لے کر بھاگنے کا الزام لگاتے ہوئے دعویٰ کیا تھا کہ ان کی ٹیم کو میلبورن میں ہوٹل، کھانا یا پانی نہیں دیا گیا۔
اس واقعے کے ٹھیک ایک ماہ بعد اب آسٹریلین ایونٹ آرگنائزر، پیس ڈی اور بکرم سنگھ رندھاوا نے گلوکارہ کی جانب سے اپنے خلاف لگائے الزامات پر ردِ عمل کا اظہار کیا ہے۔
نیہا ککڑ کے شو کے منتظمین نے دعویٰ کیا ہے کہ گلوکارہ کی جانب سے سنائی گئی کہانی جھوٹ پر مبنی ہے، اس میں کوئی سچائی نہیں ہے۔
بکرم سنگھ رندھاوا کا کہنا ہے کہ شائقین پرجوش تھے اور نیہا کا انتظار کر رہے تھے، شو کا وقت 7:30 تھا جبکہ گلوکارہ پرفارم کرنے کے لیے 10 بجے اسٹیج پر گئیں۔
ان کا کہنا تھا کہ نیہا ککڑ کو پرفارم کرنے میں اس لیے تاخیر ہوئی تھی کہ وہ صرف 700 شائقین کے سامنے پرفارم کرنے کو تیار نہیں تھیں، انہیں اپنا آپ چھوٹا محسوس ہو رہا تھا کہ وہ محض 700 افراد کے سامنے پرفارم کریں گی۔
منتظمین کے مطابق گلوکارہ کا کہنا تھا کہ شائقین سے جب ہال بھر جائے گا تو وہ پرفارم کرنے لیے اسٹیج پر جائیں گی اور اسی وجہ سے وہ ڈھائی گھنٹے تاخیر سے اسٹیج پر پہنچی تھیں۔
