کینیڈا کے انتخابات میں ایک منفرد پاکستانی نژاد امیدوار رانا اسلم کا کہنا ہے کہ وہ اپنی سرکاری نوکری سے ایک دن کی چھٹی لے کر انتخابات میں حصہ لے رہے ہیں، اگر وہ جیت گئے تو ملازمت کو خیرباد کہیں گے نہیں تو اگلے دن نوکری پر واپس چلے جائیں گے۔
کینیڈا کے شہر ہملٹن کے حلقہ انتخاب سے لبرل پارٹی آف کینیڈا کے ٹکٹ یافتہ پاکستانی نژاد امیدوار رانا اسلم کی حمایت کے لیے لبرل پارٹی کے قائد مارک کارتی دو مرتبہ ہملٹن کا دورہ کر چکے ہیں۔
رانا اسلم کی ایک دلچسپ حقیقت یہ ہے کہ وہ اسی ہملٹن شہر میں انجینئر کے طور پر سرکاری ملازم بھی ہے اور چھٹی لے کر قوائد کے مطابق الیکشن لڑ رہے ہیں، اگر وہ الیکشن جیت کر رکن پارلیمنٹ بن گئے تو 29 اپریل کو اپنی ملازمت سے استعفیٰ دے دیں گے، ورنہ وہ 29 اپریل کو اپنی چھٹی ختم ہونے پر انجینئر کی سرکاری ملازمت پر دوبارہ حاضر ہوجائیں گے۔
پاکستان میں اپنے آبائی شہر ملتان سے نقل مکانی کرکے 2003 میں کینیڈین شہر ہملٹن میں آباد ہونے والے رانا اسلم نے 2010 میں لبرل پارٹی کی ممبرشپ حاصل کی اور مختلف پارٹی عہدوں پر فائز رہنے کے علاوہ کینیڈا میں ایک بار پھر طالب علم بن کر اپنی تعلیم مکمل کرتے ہوئے فیملی کی ذمہ داریاں بھی ادا کی ہیں، وہ اب ہملٹن کے نسبتاً غریب اور مسائل کے شکار حلقے سے انتخاب لڑ رہے ہیں۔
جنگ/جیو کو انٹرویو دیتے ہوئے انہوں نے بتایا کہ امریکی صدر ٹرمپ کی ٹیرف پالیسی سے ہملٹن میں واقع المونیم بنانے کی انڈسٹری کی مشکلات میں اضافہ ہو گیا ہے اور صرف ایک ماہ میں 35 لاکھ ڈالرز کا ٹیرف المونیم کی امریکہ سپلائی پر ادا کرنا پڑا ہے، لہذا وہ اگر منتخب ہوگئے تو وہ اپنے حلقے میں نئی تعمیرات سڑکوں کی تعمیر اور مرمت اور دیگر شہری سہولیات پر توجہ دیں گے۔
انہوں نے ایک سوال کے جواب میں بتایا کہ ان کے حلقے میں پاکستانی کینیڈین ووٹرز کی تعداد برائے نام ہے لیکن انہیں اپنے انتہائی مخلص پاکستانی دوستوں کا انتہائی سرگرم تعاون اور حمایت حاصل ہے اور دیگر اقلیتوں نے بھی ان کی حمایت کا یقین دلایا ہے۔
ذرائع کے مطابق اسلم رانا کو اس حلقے میں بائیں بازو کی پارٹی این ڈی پی کے امیدوار سے سخت مقابلے کا سامنا ہے لیکن لبرل پارٹی کی مقبولیت میں اضافے کے باعث ان کی پوزیشن مضبوط ہے۔
اسلم رانا کو اپنے وطن پاکستان اور شجاع آباد کے آموں سے بڑی محبت ہے، وہ پاکستانی سیاست دانوں کی طرح نمایاں ہو کر گاڑیوں کے جلوس میں حلقے میں گشت کرنے کے بجائے گلے میں والنٹیئر کا بیچ ڈالے چند نوجوانوں کے ساتھ حلقے کے ووٹروں سے الیکشن سے ایک روز قبل بھی ملتے نظر آئے۔
