بھارت کی عام آدمی پارٹی کے سواربھ بھردواج نے پہلگام حملہ روکنے میں ناکامی اور اقدامات پر سوالات اٹھا دیے۔
سواربھ بھردواج نے بھارتی حکومت اور سیکیورٹی فورسز کو آڑے ہاتھوں لے لیا۔ انہوں نے کہا کہ دہشتگردوں نے اسلحہ کے ساتھ سرحد سے 200 کلو میٹر دور پہلگام پہنچ کر حملہ کیا اور فرار ہوگئے، حملے کے وقت بھارتی سیکیورٹی فورسز اور اس سے پہلے انٹیلی جنس کہاں تھی؟
رہنما عام آدمی پارٹی سواربھ بھردواج کا کہنا تھا کہ بھارتی حکومت کے اقدامات سے نقصان صرف بھارت کا ہی ہوگا۔
اس سے قبل بھارتی ریاست کرناٹک کے وزیرِاعلیٰ سدارامیا کا کہنا تھا کہ پاکستان کے ساتھ جنگ کی کوئی ضرورت نہیں، پہلگام واقعہ سیکیورٹی کی ناکامی ہے، جنگ کے حق میں نہیں ہیں۔
وزیرِاعلیٰ کرناٹک سدارامیا کا کہنا تھا کہ پاکستانیوں کی واپسی کے اقدامات کیے جائیں گے۔
دوسری جانب جنگ مخالف بیان پر بی جے پی کے رہنماؤں نے وزیرِاعلیٰ کرناٹک پر تنقید کی ہے۔
