(ویب ڈیسک) رہینو پلاسٹی(Rhinoplasty) پر لاہورجنرل ہسپتال شعبہ ای این ٹی کے زیر اہتمام دو روزہ انٹرنیشنل ورکشاپ کاانعقادکیاگیاجس میں ملک بھر سے 150 ای این ٹی ڈاکٹرز نے شرکت کی جنہیں جدید ٹیکنالوجی سے لائیو آپریشن سکھائے گئے۔
پرنسپل امیر الدین میڈیکل کالج پروفیسر ڈاکٹر محمد الفرید ظفر نے اس موقع پرگفتگوکرتے ہوئےکہا کہ چہرہ کسی بھی شخصیت کی اصل خوبصورتی ہے اورجدید دور میں شوبز اور دیگر شعبوں سے وابستہ مرد و خواتین اپنی ٹیڑھی، چپٹی اور بد وضع ناک کو سرجری کے ذریعے خوبصورت بنا کر اپنی شخصیت کو پُر اعتماد اورپُر کشش بناتے ہیں،ناک کا یہ جدید طریقہ علاج ”رہینو پلاسٹی ” کہلاتاہے جس پر نجی شعبوں میں لاکھوں روپے خرچ ہوتے ہیں جبکہ لاہور جنرل ہسپتال میں ناک،کان اور گلہ کے سرجنز مذکورہ آپریشن کی سہولت مفت فراہم کر رہے ہیں جو انتہائی قابل ستائش امر ہے۔
انہوں نے کہا کہ ڈاکٹرز کو چاہیے وہ خود کو جدید طبی تحقیق اور ٹیکنالوجی سے جس قدر ممکن ہو آگاہ رکھیں کیونکہ ان کا تعلق براہ راست مریضوں کے علاج وزندگی اور فلاح پر ہوتا ہے۔
انہوں نے اس موقع پر دو روزہ انٹرنیشنل” لائیو رہینو پلاسٹی ورکشاپ” کے شرکاء میں شیلڈز اور سرٹیفکیٹس تقسیم کیے ،ڈاکٹر محمد الیاس اور ڈاکٹر عامر ایوب اعوان اس کورس کے ڈائریکٹر تھے جبکہ ایم ایس ڈاکٹر فریاد حسین کے علاوہ اندرون و بیرون ممالک سے ماسٹر ٹرینیز، ڈاکٹر عارفت جاوید، پروفیسر ڈاکٹر روئی زیویر،پروفیسر ڈاکٹر طاہر رشید،پروفیسر محمد اجمل،ڈاکٹر سعادت اللہ ولیم اور ڈاکٹر خورشید عالم بھی اس موقع پر موجود تھے،لاہور کے علاوہ پاکستان کے مختلف شہروں سے بھی 150کے قریب ڈاکٹروں نے لائیورہینو پلاسٹی ورکشاپ میں حصہ لیا۔
یہ بھی پڑھیں:وزارت ریلوے کے ذیلی ادارے”ریل کاپ” کے تمام ملازمین سے استعفیٰ طلب
ینگ ڈاکٹرز نے اس اقدام کو سراہتے ہوئے کہا کہ جدید طریقہ علاج ہمارے لئے مشعل راہ ہے اورایڈوانس ٹیکنالوجی کے استعمال سے نہ صرف ہماری پیشہ وارانہ مہارت میں مزید اضافہ ہوگابلکہ مریضوں کے علاج معالجے میں بھی آسانی ہوگی۔ تمام ڈاکٹرز نے کامیاب ورکشاپ کے انعقاد پر پرنسپل پروفیسر الفرید ظفر، ایم ایس اور کورس کے ڈائریکٹر ماسٹر ٹرینیز کی کاوشوں کو سراہا۔
ایم ایس ڈاکٹر فریاد حسین نے توقع ظاہر کی کہ ڈاکٹر محمد الیا س اور ڈاکٹر عامر ایوب آئندہ بھی ایسی پیشہ وارانہ اور تعلیمی سرگرمیاں جاری رکھیں گے۔ ماسٹر ٹرینیز میں ڈاکٹر نجیف، ڈاکٹر معصوم،ڈاکٹر اسد،ڈاکٹر عدیل نیازی، ڈاکٹر مقصود احمد اورڈاکٹر وسیم امین بھی موجودتھے۔
