پاکستان کی جانب سے بھارتی ملکیت اور بھارتی آپریٹڈ ایئرلائنز پر اپنی فضائی حدود فوری طور پر بند کرنے کے اعلان کے بعد متحدہ عرب امارات (یو اے ای) اور بھارت کے درمیان پروازوں کو تاخیر اور طویل راستوں کا سامنا کرنا پڑ سکتا ہے۔
ایئر انڈیا نے خلیج ٹائمز کو جاری ایک بیان میں تصدیق کی کہ شمالی امریکا، برطانیہ، یورپ اور مشرق وسطیٰ کےلیے یا وہاں سے آنے والی کچھ پروازیں اب متبادل طویل راستہ اختیار کریں گی۔
ایئر انڈیا نے بیان میں مزید کہا گیا کہ وہ اپنے مسافروں کو اس غیر متوقع صورتحال سے پہنچنے والی زحمت پر افسوس کا اظہار کرتا ہے، جو ہمارے کنٹرول سے باہر ہے۔
یہ فضائی پابندی اس وقت عائد کی گئی ہے جب مقبوضہ کشمیر کے علاقے پہلگام میں 26 بھارتی سیاحوں کے قتل کے بعد اسلام آباد اور نئی دہلی کے درمیان تناؤ بڑھ گیا ہے۔
پاکستان کی جانب سے بھارت پر فضائی حدود کے استعمال کی پابندی مصروف ترین فضائی راستوں میں سے ایک کو شدید متاثر کر سکتی ہے۔
دبئی، ابوظہبی اور شارجہ سے دہلی، ممبئی اور بنگلورو جیسے بڑے بھارتی شہروں کی روزانہ کی کئی پروازیں پاکستانی فضائی حدود سے گزرتی ہیں تاکہ مختصر راستہ اختیار کیا جا سکے۔ فضائی حدود کی بندش کے بعد، یو اے ای میں کام کرنے والی تمام بھارتی ایئرلائنز، جیسے ایئر انڈیا، ایئر انڈیا ایکسپریس اور انڈیگو، ممکنہ طور پر عرب سمندر کے اوپر یا جنوبی سمت میں طویل راستے اختیار کرنے پر مجبور ہوں گی، جس سے پرواز کا وقت دو گھنٹے تک بڑھ سکتا ہے۔
تاہم، یو اے ای اور دیگر ممالک کی ایئرلائنز اس پابندی سے براہ راست متاثر نہیں ہوں گی کیونکہ یہ صرف بھارتی ملکیت اور آپریٹڈ ایئرلائنز پر لاگو ہوتی ہے۔
البتہ، بھارتی ہوائی اڈوں پر فضائی ٹریفک کے دباؤ اور فلائٹ شیڈول کی تبدیلیوں سے بالواسطہ اثرات مرتب ہو سکتے ہیں۔
دبئی کے ایک ٹکٹنگ ایجنٹ نے خلیج ٹائمز کو بتایا کہ اگر یہ بندش کئی دن یا ہفتے جاری رہی تو کرایوں میں اضافے اور شیڈول بری متاثر ہونے کا خدشہ ہے۔
دبئی میں اورینٹ ٹریولز کے جنرل مینجر سیلز اینڈ ہالیڈیز وسیم رحمانی کے مطابق بھارتی مسافروں کو طویل پروازوں اور زیادہ ایندھن کے خرچ کی وجہ سے کرایوں میں اضافے کا سامنا ہو سکتا ہے۔
