(ویب ڈیسک)سابق صحافی، ماڈل،وی جے اور اداکارہ نوین نقوی نے کہا ہے کہ جب سے لوگوں کو معلوم ہوا ہے کہ میں غیر شادی شدہ ہوں تومجھے انسٹاگرام پر شادی کے پیغامات آنے لگے ہیں۔
اداکارہ نے حال ہی میں ایک نجی ٹی وی کے پروگرام میں شرکت کی، جہاں مختلف معاملات پرگفتگوکی۔
نوین نقوی نے بتایا کہ ان کا بچپن سعودی عرب میں گزرا، جس کے بعد وہ کچھ عرصہ کے لیے پاکستان آئیں لیکن جلد ہی کینیڈا چلی گئیں اور پھر واپس پاکستان آئیں،اس طرح انہوں نے متعدد ممالک میں زندگی گزاری لیکن ہر چند سال بعد وہ واپس پاکستان آجاتی تھیں۔
نوین نقوی کا کہنا تھا کہ وہ پاکستان کی پہلی ریڈیو جوکی اور وی جے کا اعزاز رکھتی ہیں اور اسی زمانے میں انہوں نے ماڈلنگ بھی شروع کردی تھی،انہیں کبھی اس بات کا پچھتاوا نہیں ہوا کہ وہ کبھی کالج یا یونیورسٹی کیوں نہیں گئیں لیکن وہ تعلیم اور ڈگری کی اہمیت کو سمجھتی ہیں۔
انہوں نے بتایا کہ مختلف شعبوں میں کام کرکے اور مختلف ممالک میں زندگی گزار کر بہت کچھ سیکھا، اس لیے انہیں ڈگری کی ضرورت نہیں پڑی لیکن وہ دوسروں کو کبھی یہ مشورہ نہیں دیں گی کہ وہ ڈگری حاصل نہ کریں۔
ایک سوال کے جواب میں انہوں نے کہا کہ جب وہ سکول میں پڑھتی تھیں تب ان سے ٹیچر نے پوچھا کہ بڑے ہوکر کیا بننا ہے تو انہوں نے کہا تھا کہ وہ دلہن بنیں گی، انہیں بچپن سے کسی طرح کا کوئی شوق نہیں تھا،بچپن سے کسی طرح کا کوئی شوق نہ ہونے کے باوجود انہوں نے صحافت سے لے اداکاری تک تمام کام کیے اور کامیابیاں حاصل کیں۔
اداکارہ نے اس دوران انکشاف کیا جب سے لوگوں کو معلوم ہوا ہے کہ وہ غیر شادی شدہ ہیں، تب سے انسٹاگرام پر لوگ انہیں شادی کے پیغامات بھیجنے لگے ہیں،بہت سارے لوگ انہیں انسٹاگرام پر میسیج کرکے شادی کی پیش کش کرتے ہیں اور وہ ہر کسی کو شکریہ کا میسیج کرکے شادی سے انکار کردیتی ہیں۔
کچھ عرصہ قبل نوین نقوی نے کہا تھا کہ تاحال رشتہ ادواج سے منسلک نہ ہونے پر انہیں کوئی پچھتاوا نہیں اور نہ ہی ان کے ساتھ اتنا زیادہ مسئلہ ہوتا ہے۔
