(24نیوز) آسٹریلیا کے سابق ٹیسٹ کرکٹر کیتھ سٹیک پول 84 سال کی عمر میں انتقال کرگئے۔
کیتھ سٹیک پول نے اپنے کرکٹ کیریئر کا آغاز 1966ء میں انگلینڈ کیخلاف ایک مڈل آرڈر کھلاڑی کے طور پر کیا تھا وہ بلے بازی کے ساتھ ساتھ لیگ اسپن بولر بھی تھے لیکن 1969ء کے اوائل میں وہ بل لاری کے ساتھ اوپننگ کرتے تھے ،کیتھ اسٹیک پول کو 43 ٹیسٹ اور 6 ایک روزہ بین الاقوامی کرکٹ میچز میں آسٹریلیا کی نمائندگی کا اعزاز حاصل ہے۔
کیتھ سٹیک پول نے 43 ٹیسٹ میچز میں 7 سنچریاں اور 14 نصف سنچریاں اسکور کیں، اس دوران انہوں نے 37.42 کی اوسط سے 2807 رنز سکور کیے، ان کی ٹیسٹ کرکٹ میں کیریئر بیسٹ اننگز 207 رنز تھی جو انہوں نے 1970ء میں گابا کے مقام پر انگلینڈ کیخلاف اسکور کی تھی۔
آسٹریلوی بلے باز نے کیپ ٹاؤن میں جنوبی افریقا کیخلاف اپنی پہلی ٹیسٹ سنچری اسکور کی، کیتھ اسٹیک پول 1972ء کی ایشز میں ای ین چیپل کے نائب کپتان تھے، انہیں 1973ء میں وزڈن کرکٹر آف دی ایئر قرار دیا گیا تھا۔
کرکٹ آسٹریلیا (سی اے) کے چیئرمین مائیک بیرڈ نے کہا ہے کہ کیتھ اسٹیک پول کرکٹ کے کھیل کے عظیم کھلاڑیوں میں سے ایک تھے جن کو کبھی فراموش نہیں کیا جائے گا،کیتھ سٹیک پول ناصرف آسٹریلیا اور وکٹوریہ کیلئے ایک شاندار کھلاڑی تھے، بلکہ میڈیا، ریڈیو اور ٹی وی کی کمنٹری میں ان کا کام نئے لوگوں کیلئے مشعل راہ ہے۔
انہوں نے جنوری 1971ء میں پہلا ون ڈے میچ کھیلا، انہیں 1974ء میں کرکٹ کیلئے خدمات پر ایم بی ای سے نوازا گیا، انہوں نے فرسٹ کلاس کرکٹ میں مجموعی طور پر 10,100 رنز بنائے اور 148 وکٹیں حاصل کیں، وہ ایک ممتاز ٹی وی اور ریڈیو مبصر بھی تھے۔
یہ بھی پڑھیں ؛ “ہم آپ کے ہیں کون” کاسیکوئل:سلمان خان اورمادھوری جلوہ گرہوں گے؟
