موسیقی کی دنیا میں خواتین گلوکاروں کی کامیابیوں کو سراہنے کےلیے معروف میوزک اسٹریمنگ کمپنی نے اپریل کے مہینے کےلیے مشہور گلوکارہ میشا شفیع کو ایکول پاکستان ایمبیسیڈر منتخب کیا ہے۔
اس سلسلے میں میشا شفیع نیو یارک کے مشہور ٹائمز اسکوائر میں اسپاٹیفائی کے ڈیجیٹل بل بورڈ پر 17 اپریل کو نمایاں انداز سے جلوہ گر ہوئیں۔ اس طرح وہ ان نئے اور مشہور پاکستانی گلوکاروں کی فہرست میں شامل ہوگئیں جنہیں اس عالمی مقام پر پیش ہونے کا اعزاز حاصل ہوا۔
میشا شفیع اپنی شاندار پرفارمنس اور طاقتور آواز سے دنیا بھر کے سامعین کی توجہ اپنی جانب مبذول کرواچکی ہیں۔ ان کے مقبول ترین گانوں میں ’الف اللّٰہ‘، ’معزز صارف‘ اور ’آیا لاڑیے‘ شامل ہیں جو آج بھی مداحوں کے دلوں پر راج کرتے ہیں۔
دلچسپ بات یہ ہے کہ ان کے سامعین میں 38 فیصد کا تعلق نوجوان نسل سے ہے، اسکا مطلب ہے کہ انکے مداحوں میں ہر عمر کے افراد موجود ہیں جس سے انکی وسیع مقبولیت سامنے آتی ہے۔
یہاں انکے پرستاروں کےلیے یہ خوشخبری بھی ہے کہ میشا شفیع اپنے نئے البم ’کھلنے کو‘ کے ہمراہ دو سال کے وقفے کے بعد موسیقی کی دنیا میں واپس آئی ہیں۔ اس البم کو مداحوں اور شائقین موسیقی کی جانب سے خوب سراہا جا رہا ہے، جس میں ان کے مخصوص انداز اور گہرائی کو بخوبی محسوس کیا جا سکتا ہے۔
پاکستان و متحدہ عرب امارات کی آرٹسٹ اینڈ لیبل پارٹنرشپس منیجر رطابہ یعقوب نے کہا، ’میشا شفیع ایکول پاکستان کی سوچ کی عملی تصویر ہیں جو موسیقی کی دنیا میں روایتی رکاوٹوں کو عبور کرکے نئے معیار قائم کر رہی ہیں۔ انہوں نے موسیقی کی دنیا میں نئی راہیں بنائیں، روایتی دھنوں اور جدید انداز کو ایک ساتھ لے کر چلنے کی جو صلاحیت ان کے پاس ہے وہ انہیں عالمی سطح پر ممتاز بناتی ہے۔‘
انکا یہ بھی کہنا تھا کہ پاکستان، بھارت، امریکا، برطانیہ اور کینیڈا جیسی بڑی اسٹریمنگ مارکیٹوں میں ان کی بھرپور موجودگی کے ساتھ ان کی آواز بین الاقوامی سطح پر سامنے آتی ہے۔
میشا شفیع اسپاٹیفائی کی نمایاں پلے لسٹس میں شامل ہوچکی ہیں جن میں ’ساؤتھ ایشین صوفی‘، ’بیسٹ آف کوک اسٹوڈیو‘، ’دیسی کور‘ اور اب ’ایکول پاکستان‘ شامل ہیں، جس سے ان کی ہمہ جہت گلوکارانہ صلاحیتوں کا اظہار ہوتا ہے۔
