اپنے نام پر مندر بنائے جانے کے بیان پر اروشی روٹیلا تنازع کا شکار ہوگئیں جس پر اب اداکارہ کی وضاحت بھی سامنے آگئی۔
بھارتی اداکارہ و رقاصہ اُروشی روٹیلا حال ہی میں اس وقت تنازع کا شکار ہوگئیں جب انہوں نے یہ دعویٰ کیا کہ ریاست اتراکھنڈ میں بدری ناتھ مندر کے قریب ان کے نام پر ایک مندر قائم ہے۔
ساتھ ہی انہوں نے جنوبی بھارت میں بھی اسی طرح کا مندر بنانے کی یہ کہتے ہوئے خواہش ظاہر کی کہ انہوں نے اس خطے میں کافی فلمیں کی ہیں۔
اس بیان نے ایک تنازع کھڑا کردیا اور بدری ناتھ کے پنڈتوں اور مقامی افراد نے سخت ناراضی کا اظہار کیا۔
تاہم اب اُروشی روٹیلا کی ٹیم نے اس پورے معاملے پر وضاحت جاری کرتے ہوئے کہا کہ اداکارہ نے کبھی یہ دعویٰ نہیں کیا کہ وہ مندر ان کا “اپنا” ہے یا انہوں نے اسے ملکیت کے طور پر پیش کیا۔
بیان میں کہا گیا، “اُروشی روٹیلا نے صرف یہ کہا تھا کہ اتراکھنڈ میں ان کے نام پر ایک مندِر ہے، نہ کہ ‘اُروشی روٹیلا کا مندِر’۔ لیکن لوگ مکمل بات سننے کے بجائے صرف ‘اُروشی’ اور ‘مندر’ سن کر یہ فرض کر لیتے ہیں کہ لوگ ان کی پوجا کر رہے ہیں۔ براہِ کرم مکمل ویڈیو سنیں اور پھر رائے قائم کریں۔”
قانونی کارروائی کی وارننگ
اُروشی کی ٹیم نے واضح کیا کہ جو افراد ان کے بیانات کو غلط انداز میں پیش کر رہے ہیں، ان کے خلاف قانونی ایکشن لیا جا سکتا ہے۔
ساتھ ہی انہوں نے معاشرے میں باہمی عزت اور شائستہ گفتگو کی اہمیت پر بھی زور دیا۔
بیان کے آخر میں کہا گیا، “یہ ضروری ہے کہ کسی بھی فرد پر بےبنیاد الزامات لگانے یا توہین آمیز تبصرے کرنے سے قبل حقائق کی مکمل تحقیق کی جائے۔ معاشرے میں سب کو عزت و احترام سے پیش آنا چاہیے تاکہ ہر فرد کے حقوق کا تحفظ ممکن ہو۔”
