بلیو اوریجن کا آل ویمن مشن دنیا کی توجہ کا مرکز بن گیا، امریکی گلوکارہ کیٹی پیری سمیت 6 خواتین خلاء کے سفر پر آج روانہ ہوں گی۔
جیف بیزوس کی کمپنی بلیو اوریجن (Blue Origin) آج ایک تاریخی خلائی مشن لانچ کرنے جا رہی ہے، جس میں کیٹی پیری سمیت 6 خواتین خلاء کے سفر پر روانہ ہو رہی ہیں۔
یہ مشن ناصرف تکنیکی لحاظ سے اہم ہے بلکہ سماجی اور علامتی اعتبار سے بھی ایک سنگِ میل ہے۔
گزشتہ 60 برس میں پہلی مرتبہ صرف خواتین پر مشتمل عملہ خلاء کی جانب روانہ ہو رہا ہے۔
مشن بلیو اوریجن کے نیو شیپرڈ (New Shepard) پروگرام کے تحت ہو رہا ہے، جس کا کوڈ NS-31 ہے۔
راکٹ پیر کو مقامی وقت کے مطابق 8:30 بجے صبح ٹیکساس کے لانچنگ پیڈ سے روانہ ہو گا۔
یہ راکٹ تقریباً 11 منٹ کے سفر کے دوران زمین سے تقریباً 100 کلو میٹر (62 میل) کی بلندی تک جائے گا اور خلاء کی بین الاقوامی سرحد کارمن لائن (Kármán Line) کو عبور کرے گا۔
مشن کی قیادت جیف بیزوس کی منگیتر لارن سانچیز (Lauren Sánchez) کر رہی ہیں، ان کے ہمراہ 5 خواتین مشہور پاپ سنگر کیٹی پیری، معروف صحافی اور ٹی وی پریزینٹر گیل کِنگ، شہری حقوق کی علمبردار اور نوبیل انعام کی نامزد امیدوار امانڈا نگوین، ہالی ووڈ فلم پروڈیوسر کریان فلن اور سابق ناسا راکٹ سائنٹسٹ اور کاروباری خاتون عائشہ بوئے شامل ہیں۔
یہ پہلی بار ہے کہ کوئی مکمل طور پر خواتین پر مشتمل مشن خلاء میں جا رہا ہے۔
اس سے پہلے 1963ء میں روسی انجینئر ویلنٹینا تیریشکووا تنہا خلاء میں گئی تھیں۔
