جاپان کے شہر اوساکا میں دنیا کی سب سے بڑی تجارتی اور ثقافتی نمائش ”ورلڈ ایکسپو 2025“ کا باقاعدہ آغاز ہو گیا۔
افتتاحی تقریب میں جاپان کے وزیرِاعظم فومیو کشیدا نے خصوصی شرکت کی اور نمائش کے تھیم ”ہماری زندگیوں کے لیے مستقبل کی سوسائٹی کو ڈیزائن کرنا“ پر روشنی ڈالتے ہوئے کہا کہ یہ ایکسپو عالمی تعاون اور مشترکہ ترقی کی علامت ہے۔
نمائش کے افتتاحی دن عوامی دلچسپی دیدنی رہی اور منتظمین کے مطابق تقریباً ڈیڑھ لاکھ افراد نے ایکسپو کا دورہ کیا، جو ان کی توقعات سے کہیں زیادہ تھا۔
اس عالمی میلے میں پاکستان کے سفیر برائے جاپان رضا بشیر تارڑ نے بھی خصوصی شرکت کی۔
پاکستانی سفیر نے اس موقع پر پاکستانی پویلین کا دورہ کیا اور نمائش میں پاکستان کی بھرپور شرکت کو سراہا۔
انہوں نے کہا کہ یہ ایکسپو پاکستان کےلیے اپنی ثقافت، مصنوعات اور سیاحت کو دنیا کے سامنے لانے کا سنہری موقع ہے۔
ورلڈ ایکسپو 2025 جاپان کے شہر اوساکا میں 13 اپریل 2025 کو شروع ہوئی ہے اور یہ 13 اکتوبر 2025 تک جاری رہے گی۔
اس نمائش میں دنیا بھر کے 160 سے زائد ممالک اور بین الاقوامی تنظیمیں شریک ہیں۔ منتظمین کے مطابق 2 کروڑ 80 لاکھ سے زائد افراد کی آمد متوقع ہے۔
پاکستان نے ایکسپو میں بھرپور شرکت کا اعلان کیا، جہاں پاکستانی پویلین کا مرکزی فوکس گلابی نمک (Pink Salt) اور اس سے بنی مصنوعات پر رکھا گیا ہے۔
وفاقی وزیرِ تجارت جام کمال خان نے ٹریڈ ڈویلپمنٹ اتھارٹی آف پاکستان (TDAP) کو ہدایت دی ہے کہ وہ اس عالمی پلیٹ فارم پر پاکستانی مصنوعات کو بھرپور انداز میں متعارف کروائے اور میڈیا مہم کے ذریعے عالمی سطح پر تشہیر کرے۔
دنیا بھر کے دیگر ممالک بھی اپنے انفرادی پویلینز کے ذریعے اپنی ثقافت، ایجادات اور مستقبل کے وژن کو پیش کر رہے ہیں۔ خاص طور پر سعودی عرب، جس نے سب سے پہلے اپنے پویلین کی تعمیر کا آغاز کیا تھا، ماحولیاتی تحفظ اور پائیداری کے نظریے کے ساتھ اپنی موجودگی درج کروا رہا ہے۔
بھارت، چین، امریکہ، جرمنی، فرانس، اٹلی، ایران اور متحدہ عرب امارات بھی شامل ہیں اور اپنی جدید ٹیکنالوجیز اور ثقافت کو دنیا کے سامنے لا رہے ہیں۔
یاد رہے کہ جاپان کو ایکسپو کی میزبانی کا شاندار تجربہ حاصل ہے۔ اس سے قبل اوساکا نے 1970 اور 1990 میں بھی ورلڈ ایکسپو کا انعقاد کیا تھا۔ اس بار بھی جاپانی حکومت نے بڑے پیمانے پر تیاری کی ہے اور امید کی جا رہی ہے کہ یہ عالمی میلہ نہ صرف جاپان بلکہ دنیا بھر کے ممالک کے لیے اقتصادی، تجارتی اور ثقافتی اعتبار سے ایک یادگار موقع بنے گا۔
پاکستانی سفیر رضا بشیر تارڑ کا کہنا تھا کہ پاکستانی پویلین دنیا بھر کے سیاحوں کے لیے کشش کا باعث بنے گا اور پاکستان کی معدنی دولت بالخصوص گلابی نمک کی عالمی مارکیٹ میں مزید رسائی پیدا ہوگی۔ ان کا کہنا تھا کہ پاکستانی کمیونٹی جاپان میں ایکسپو کے دوران بھرپور انداز میں حصہ لے رہی ہے، جو قومی تشخص کو اُجاگر کرنے میں مدد دے گی۔
ایکسپو 2025 نہ صرف دنیا بھر کے ممالک کےلیے اپنی مصنوعات اور ثقافت کو متعارف کروانے کا ایک عظیم موقع ہے، بلکہ یہ عالمی سطح پر مشترکہ ترقی، ماحولیاتی تحفظ اور پائیدار معیشت کے فروغ کے لیے بھی سنگِ میل ثابت ہوگا۔
