اسرائیل کے غزہ پر وحشیانہ حملوں کے خلاف نیویارک کے ٹائمز اسکوائر پر مظاہرین نے احتجاج کیا۔
امریکی میڈیا کی رپورٹ کے مطابق نیویارک کے ٹائمز اسکوائر پر لوگوں کی بڑی تعداد جمع ہوئی جنہوں نے معصوم فلسطینیوں پر اسرائیلی بربریت کے خلاف احتجاج کیا۔
مظاہرین نے مطالبہ کیا کہ غزہ پر اسرائیلی حملے روکے جائیں اور فلسطین کے حق میں آواز اٹھانے والے طالب علم محمود خلیل کو بھی رہا کیا جائے۔
دوسری جانب غزہ میں حالیہ اسرائیلی حملوں کے خلاف اسرائیلیوں نے بھی مقبوضہ بیت المقدس میں احتجاج کیا جنہیں منتشر کرنے کے لیے اسرائیلی پولیس نے تشدد کا نشانہ بنایا۔
واضح رہے کہ منگل کو اسرائیل نے غزہ جنگ بندی یک طرفہ طور پر ختم کرتے ہوئے وحشیانہ بم باری کی تھی، حملوں میں 400 سے زیادہ فلسطینی شہید ہوئے تھے۔
اقوامِ متحدہ، یورپی یونین، روس، برطانیہ، فرانس، سعودی عرب، قطر، ایران سمیت دیگر ممالک نے اسرائیلی حملوں کی مذمت کرتے ہوئے غزہ پر اسرائیلی حملے فوری روکنے کا مطالبہ کیا ہے۔
