کراچی (اسٹاف رپورٹر)آسٹریلیاکے سابق کپتان رکی پونٹنگ نے چیمپئنز ٹرافی کا فائنل آسٹریلیا اور بھارت کے درمیان ہونے کی پیشگوئی کی ہے لیکن یہ بھی خبردار کیا ہے کہ پاکستانی ٹیم دونوں ٹیموں کے لیے چیلنج بنے گی۔ آئی سی سی ریویو میں اظہار خیال کرتے ہوئےانہوں نے کہا کہ آسٹریلیا اور بھارت کی حالیہ تاریخ اور آئی سی سی ایونٹس میں کارکردگی سب کچھ واضح کرتی ہے۔ البتہ ایک اور ٹیم جو اس وقت کچھ اچھی کرکٹ کھیل رہی ہے وہ پاکستان ہے، ان کی ون ڈے کرکٹ کچھ عرصے سے شاندار ہے۔ ہم جانتے ہیں کہ بڑے ٹورنامنٹ میں پاکستان کے بارے میں زیادہ پیش گوئی نہیں کی جاسکتی لیکن لگتا ہے پاکستان نے کچھ چیزوں کو بہت بہتر کر لیا ہے۔
