کراچی(اسٹاف رپورٹر) پاکستان سپر لیگ میں ابتدائی9سال کوئٹہ گلیڈی ایٹرز کی فتوحات میں مرکزی کردار ادا کرنے والے سرفراز احمد اس سال کوچنگ کے رول میں دکھائی دیں گے۔ شعیب ملک بھی پی ایس ایل میں پک نہ ہوسکے۔ سابق کپتان نے کراچی کنگز کو خیر باد کہہ دیا تھا انہیں کسی ٹیم نے شامل کرنے سے گریز کیا۔ سرفراز اور شعیب ملک پی سی بی کے مینٹور ہیں۔ سرفراز احمد ان دنوں اپنے اہل خانہ کے ساتھ انگلینڈ میں ہیں ۔ پیر کو کوئٹہ گلیڈی ایٹرزکے مالک ندیم عمر نے کہا کہ سرفراز احمد ایک نئے رول میں دکھائی دیں گے، ان کارول کوچنگ کا ہوگا ، وہ کوئٹہ گلیڈی ایٹرز کی جان ہیں۔ میں اور معین خان بیک سیٹ پرہوں گے۔ لیکن ندیم عمر نے وضاحت نہیں کی کہ وہ کس طرح کی کوچنگ کریں گے۔ ڈائریکٹر کوئٹہ گلیڈی ایٹرز معین خان نے کہا کہ محمد حسنین کا کوئی تکنیکی مسئلہ نہیں تھا، باہمی رضامندی سے ریلیز کیا تھا۔ اس مرتبہ بہترکمبی نیشن کے ساتھ جانے کی کوشش کررہے ہیں۔ اسکواڈ متوازن ہے،فہیم اشرف اچھا فنشر ہے اسے پک کرنے کا سوچ کر آئے تھے۔
