معروف سابق مکس مارشل آرٹ فائٹر، خبیب نُرماگومیدوف کو جہاز سے آف لوڈ کردیا گیا۔
سوشل میڈیا پر ایک ویڈیو وائرل ہوئی ہے جس میں الاسکا ایئرلائن کی ایک پرواز کے دوران یو ایف سی چیمپئن خبیب نورماگومیدوف کو ایک ناخوشگوار صورت حال کا سامنا کرنا پڑا۔
ہیرری رِیڈ انٹرنیشنل ایئرپورٹ لاس ویگاس میں خبیب کو لاس اینجلس جانے والی پرواز سے اُترنے پر مجبور کیا گیا۔
فضائی میزبان نے خبیب کے ساتھ بات چیت کرتے ہوئے کہا کہ ہم آپ کو ایمرجنسی رو پر بیٹھنے کی اجازت نہیں دے سکتے، میں اپنے سپروائزر کو بلاتی ہوں، آپ دوسری سیٹ لے سکتے ہیں یا ہم آپ کو طیارے سے اُتار سکتے ہیں۔
جس پر خبیب نے فلائٹ اٹینڈنٹ کے فیصلے کو غیر منصفانہ قرار دیا اور کہا ’یہ صحیح نہیں ہے۔‘ وہ یہ بھی کہتے ہیں کہ چیک ان کے دوران ان سے پوچھا گیا تھا کہ کیا وہ انگریزی جانتے ہیں اور انہوں نے ہاں کہا تھا، تو پھر یہ فیصلہ کیوں کیا گیا؟
فلائٹ اٹینڈنٹ کے منیجر نے خبیب کو متبادل سیٹ دینے کی پیشکش کی اور انہیں دوسری پرواز لینے کی بھی تجویز دی۔ تاہم اس کے باوجود خبیب اور ان کے ساتھیوں کو طیارے سے اُتار دیا گیا۔
ویڈیو میں خبیب اپنا سامان اٹھا کر جہاز سے باہر جاتے بھی نظر آرہے ہیں۔
