محکمہ نارکوٹکس کنٹرول سندھ نے گھگھر پھاٹک کے قریب گاڑی سے اربوں روپے کی منشیات برآمد کرلی۔
محکمہ نارکوٹکس کنٹرول سندھ کی فورس نے کارروائی میں 2 ملزمان کو گرفتار کرلیا ہے۔
کراچی میں سسی ٹول پلازہ کے قریب اسنیپ چیکنگ کے دوران محکمہ نارکوٹکس کنٹرول سندھ نے کارروائی کرتے ہوئے غیر قانونی اور غیر رجسٹرڈ پین کلر گولیوں سے بھری گاڑی کو قبضے میں لے لیا۔
اس معاملے پر وزیر ایکسائز، ٹیکسیشن اور نارکوٹکس کنٹرول سندھ مکیش کمار چاولہ نے کہا کہ گاڑی سے 36 لاکھ گولیاں ملی ہیں، اس ڈرگ کو آئس میں بھی استعمال کیا جاسکتا ہے ۔
میڈیا بریفنگ میں صوبائی وزیر نے کہا کہ ضبط شدہ ادویات کا لیبارٹری ٹیسٹ کیا گیا، جس سے یہ انکشاف ہوا کہ ان ادویات سے بڑی تعداد میں آئس کرسٹل اور کوکین تیار کی جا سکتی تھی۔
انہوں نے کہا کہ ہم نے صوبے کے داخلی و خارجی راستوں کی نگرانی سخت کر دی ہے اور شہروں میں اسنیپ چیکنگ بڑھا دی ہے، یہ منشیات فروشوں کے خلاف ہماری جاری جنگ کا حصہ ہے۔
اس موقع پر سیکریٹری ایکسائز، ٹیکسیشن و نارکوٹکس کنٹرول محمد سلیم راجپوت اور سندھ ڈرگز کنٹرول اتھارٹی کے افسران بھی موجود تھے۔
