وفاقی وزیر مصدق ملک نے کہا ہے کہ حقوق اور انصاف کے اصولوں کا اطلاق بلا امتیاز ہونا چاہیے۔

مصدق ملک نے اقوامِ متحدہ کے اتحاد تہذیبوں کے 11ویں عالمی فورم سے خطاب کے دوران کہا کہ خواتین، اقلیتوں، بچوں اور ماحولیات کے حقوق بنیادی اور ناقابلِ تردید ہیں۔

مصدق ملک کا سوال اٹھاتے ہوئے کہنا تھا کہ کیا فلسطینیوں اور کشمیریوں کے حقوق بھی اتنی ہی اہمیت رکھتے ہیں؟ کشمیر کے عوام بھی اقلیتوں میں شمار ہوتے ہیں، مقبوضہ کشمیر میں کشمیریوں کو بھی وہی حقوق ملنے چاہئیں جو دنیا بھر میں دیگر اقلیتوں کو حاصل ہیں۔

انہوں نے مزید کہا کہ بالائی دریا کنارے ممالک کی ذمہ داری ہے کہ وہ زیریں دریا کنارے ممالک کے حقوق کا احترام کریں، پانی کے منصفانہ اور منظم استعمال کے بغیر علاقائی استحکام، پائیدار ترقی اور انسانی سلامتی ممکن نہیں۔

کراچی(اسٹاف رپورٹر) سینٹیاگومیں پرو ہاکی لیگ میں ارجنٹینا نے پاکستان کو 5-1 سے ہرا دیا ۔پاکستان ہاکی ٹیم پرو ہاکی لیگ کے پہلے مرحلے میں ارجنٹینا اور نیدرلینڈز سے چاروں میچ ہار چکی ہے۔

واشنگٹن:

واشنگٹن میں پاکستان کے سفیر رضوان سعید شیخ نے صدارتی کونسل برائے ڈیجیٹل اثاثہ جات کے ایگزیکٹو ڈائریکٹر پیٹرک وٹ سے اہم ملاقات کی، جس میں نئی معیشت، ڈیجیٹل فنانس اور بلاک چین کے فروغ پر تفصیلی تبادلۂ خیال کیا گیا۔

اس موقع پر سفیرِ پاکستان نے ڈیجیٹل فنانس اور بلاک چین انقلاب کو منظم کرنے کے حوالے سے امریکی صدر ڈونلڈ ٹرمپ کے قائدانہ کردار کو لائقِ تحسین قرار دیا۔

انہوں نے کہا کہ پاکستان میں ڈیجیٹل اثاثوں اور کرپٹو کرنسی کے فروغ اور ان کے لیے قواعد و ضوابط کی تشکیل کے ضمن میں بڑے پیمانے پر پیش رفت ہو چکی ہے۔

رضوان سعید شیخ نے بتایا کہ پاکستان کرپٹو کونسل کا قیام، ورچوئل اثاثہ جات آرڈیننس 2025 کا اجراء، پاکستان ورچوئل ایسٹس ریگولیٹری اتھارٹی کی تشکیل اور اسٹیٹ بینک آف پاکستان کی جانب سے نئی پالیسی کا اطلاق، ڈیجیٹل اثاثہ جات کے حامل لاکھوں پاکستانی صارفین کو سہولت فراہم کرنے کے لیے ایک جامع اور مضبوط ادارہ جاتی فریم ورک متعارف کرانے کی عملی کوششوں کا مظہر ہے۔

سفیرِ پاکستان نے اس عزم کا اظہار کیا کہ پاکستان ڈیجیٹل اثاثوں اور کرپٹو کرنسی کے شعبے میں امریکہ کے ساتھ باہمی طور پر سودمند شراکت داری کا خواہاں ہے۔

ان کا کہنا تھا کہ نئی معیشت کا راستہ تعاون، اشتراک اور ہم آہنگی سے ہو کر گزرتا ہے، جس کے ذریعے دونوں ممالک مشترکہ ترقی اور اختراع کو فروغ دے سکتے ہیں۔

ملک کے مختلف شہروں کی فضا آج بھی انتہائی مضر صحت ہے، کچھ دیر پہلے لاہور 342 ایئر پارٹیکولیٹ میٹر کے ساتھ دنیا کے بڑے آلودہ ترین شہروں میں پہلے نمبر پر تھا۔

عالمی ماحولیاتی ویب سائٹ کے مطابق پشاور 435  اے کیو آئی کے ساتھ ملک کا آلودہ ترین شہر ہے۔

فیصل آباد میں فضائی آلودگی کا انڈیکس 278 ریکارڈ کیا گیا۔

محکمہ ماحولیات پنجاب کے مطابق نارووال کا اے کیوآئی 279، شیخوپورہ کا 251 اور خانیوال کا 236 ریکارڈ کیا گیا۔

امریکی صدرڈونلڈ ٹرمپ نے کہا ہے کہ روس اور یوکرین کی جنگ کے خاتمے کے معاہدے کے بہت قریب ہیں۔

ٹرمپ کا کہنا تھا کہ یوکرینی اور یورپی قیادت سے جنگ بندی پر بات ہوئی، امن منصوبے کو یورپی رہنماؤں کی مکمل حمایت حاصل ہے۔

انہوں نے کہا کہ جنگ بندی پر روسی صدر پیوٹن سے بھی بات ہوئی ہے۔

حیدرآباد:

ٹنڈو محمد خان روڈ پر ایک دلخراش حادثے میں دو بچیاں موقع پر جاں بحق اور ایک عورت شدید زخمی ہو گئی۔

پولیس کے مطابق واقعہ گاوں بچل شورو کے سامنے پیش آیا، جہاں ایک مسافر کوسٹر نے دو بچیوں اور ایک عورت کو ٹکر مار دی۔

متوفی بچیوں کی شناخت 15 سالہ بھوری بنت ڈنو میر جت اور 5 سالہ صائمہ بنت بلاول میرجت کے نام سے کی گئی ہے، جبکہ زخمی خاتون 30 سالہ گلناز زوجہ بلال میرجت ہیں۔

پولیس کے مطابق جاں بحق بچی صائمہ زخمی خاتون گلناز کی بیٹی تھی۔

حادثے کے بعد ڈرائیور فرار ہوگیا، تاہم کوسٹر کو تحویل میں لے لیا گیا ہے۔

جاں بحق بچیوں اور زخمی خاتون کو سول ہسپتال منتقل کر دیا گیا، جبکہ پولیس نے مزید تفتیش کا آغاز کر دیا ہے۔