کراچی:
سانحہ قلات کے شہداء کو خراج عقیدت پیش کرنے کے لیے آل کراچی تاجر الائنس کے تحت اتوار کو نمائش چورنگی سے تبت سینٹر ایم اے جناح روڈ تک “شہدائے قلات ریلی” نکالی گئی ۔ ریلی کے شرکاء نے قومی پرچم اٹھارکھے تھے، ریلی کے شرکاء نے پاک فوج کے حق میں نعرے لگائے، ریلی کے شرکاء نے بھارت اور فتنہ الہندوستان کے خلاف نعرے بازی کی ، ریلی میں ایم کیوایم پاکستان، پاکستان سنی تحریک سمیت مختلف جماعتوں، تاجر تنظیموں، سول سوسائٹی اور شہریوں کی بڑی تعداد نے شرکت کی۔
ریلی کی قیادت کراچی تاجر الائنس کے سرپرست اعلی خواجہ جمال سیھٹی نے کی، خواجہ جمال سیھٹی نے پاک فوج کی جانب سے بھارت کو عبرتناک شکست دینے اور ملک سے دہشت گردی کے خاتمے بھرپور اقدام پر فیلڈ مارشل عاصم منیر اور پوری مسلح افواج کو زبردست خراج تحسین پیش کیا اور انہوں نے سانحہ قلات کے شہداء کو بھی خراج عقیدت پیش کیا۔
ریلی سے خطاب کرتے ہوئے سیاسی جماعتوں، تاجر تنظیموں اور سوسائٹی کے رہنماؤں نے کہا کہ پاکستان ایک پر امن ملک ہے۔ پاکستان ہمیشہ دہشت گردی کی مذمت کرتا ہے۔پاکستان نے دہشت گردی کے خاتمے کے لیے بڑی قربانیاں دی ہیں۔
ان رہنماؤں نے کہا کہ پاکستان کی مسلح افواج نے بھارت کو حالیہ جنگ میں بھرپور شکست دی ۔عالمی سطح پر پاکستان کی مربوط سفارت کاری سے مودی حکومت ذلت وتنہائی کا شکار ہے۔ان رہنماؤں نے کہا کہ بھارت اور اس کی خفیہ ایجنسی را پاکستان کو عدم استحکام کرنے کی سازشوں میں ملوث ہے۔ بھارتی ایجنڈا پر کام کرنے والی ان کی سہولت کار دہشت گرد تنظیم فتنہ الہندوستان بلوچستان میں حالات خراب کررہی ہے۔فتنہ الہندوستان کے دہشت گرد معصوم اور بے گناہ شہریوں کو بلوچستان میں نشانہ بنارہے ہیں۔معصوم لوگوں کو شہید کیا جارہا ہے۔ایک سازش کے تحت بلوچستان کے حالات کو خراب کرنے کا منصوبہ بنایا گیا ہے۔
پاک فوج اور سیکورٹی ادارے بلوچستان میں بحالی امن کے لیے اپنے جانوں کے نذرانے پیش کررہے ہیں۔بلوچستان میں جب بھی فوج اور سیکورٹی ادارے فتنہ الہندوستان کے دہشت گردوں کے خلاف کارروائی کرتے ہیں لیکن چند نام نہاد ملک دشمن سوشل میڈیا ایکٹوسٹ ان دہشت گروں کی حمایت کرتے ہیں اور دنیا کو غلط معلومات فراہم کرتے ہیں۔
ان رہنماؤں نے کہا کہ فتنہ الہندوستان کے دہشت گردوں نے حالیہ دنوں میں کراچی سے بلوچستان خوشی کے پروگرام میں جانے والے قوالوں اور فنکاروں کو قلات میں نشانہ بنایا۔معصوم قوالوں کو شہید کیا گیا ۔ہم اس واقعہ کی شدید مذمت کرتے ہیں۔ان رہنماؤں نے کہا کہ پوری قوم مطالبہ کرتی ہے کہ بلوچستان میں فتنہ الہندوستان کے دہشت گردوں کے خلاف بھرپور آپریشن کیا جائے۔ہم اس آپریشن کی مکمل حمایت کرتے ہیں ۔
ان رہنماؤں نے سانحہ قلات کے شہداء کو خراج عقیدت پیش کیا۔انہوں نے حکومت سے مطالبہ کیا کہ سانحہ قلات کے شہداء کے ورثاء اور زخمیوں کو معاوضہ دیا جائے ۔ریلی کے شرکاء نے پاک فوج کے ساتھ مکمل اظہار یکجہتی کیا۔
