بلوچستان نیشنل پارٹی (بی این پی) کے سربراہ سردار اختر مینگل کو بیرونِ ملک سفر سے روک دیا گیا۔
فیڈرل انویسٹی گیشن ایجنسی (ایف آئی اے) نے کوئٹہ سے دبئی جانے والی نجی ایئر لائن کی پرواز سے اختر مینگل کو آف لوڈ کر دیا۔
ایف آئی اے کا کہنا ہے کہ اختر مینگل کا نام پروویشنل نیشنل آئیڈینٹیفکیشن لسٹ (پی این آئی ایل) میں شامل ہے۔
اس حوالے سے سردار اختر مینگل کا کہنا ہے کہ امیگریشن اسٹاف نے مجھے آف لوڈ کرتے ہوئے بتایا کہ میرا نام پی این آئی ایل میں ہے۔
سابق وفاقی وزیر آغا حسن اور غلام نبی مری نے اختر مینگل کو آف لوڈ کیے جانے کی مذمت کرتے ہوئے کہا ہے کہ اختر مینگل کو بیرونِ ملک سفر سے روکنا غیر قانونی اور غیر آئینی ہے۔
انہوں نے یہ بھی کہا ہے کہ اختر مینگل تاحال رکنِ قومی اسمبلی ہیں، ان کا استعفیٰ بھی ابھی منظور نہیں کیا گیا۔
