لاہور:
گروپ ایڈیٹر ایکسپریس ایاز خان کا کہنا ہے کہ نریندر مودی کا خطاب دنیا کو دھوکا دینے کیلیے نہیں تھا وہ اپنے لوگوں بھارتیوں کو دھوکا دینے کیلیے تھا، جتنی بڑی متھ بنی ہوئی تھی، مائٹ بنی ہوئی تھی ان کی نظر میں وہ جب برباد ہوئی ہے تو ظاہر ہے کہ مودی اور کیا کرے۔
ایکسپریس نیوز کے پروگرام ایکسپرٹس میں گفتگو کرتے ہوئے انھوں نے کہا کہ مودی کے پاس منہ چھپانے کے لیے جگہ نہیں ہے.
تجزیہ کار فیصل حسین نے کہا کہ اللہ کرے مودی اپنی قوم کو دھوکہ دینے میں کامیاب ہو جائے، ہمیں کیا پرابلم ہے، ہمیں تو مودی کا شکریہ ادا کرنا چاہیے آپ کو اس نے دنیا کی چوتھی بڑی فوجی قوت بنا دیا ہے، آپ منتشر تھے تقسیم تھے آپس میں لڑے ہوئے تھے سیاسی اختلافات کا شکار تھے اختلافات ختم کرا دیے، پوری قوم ایک ہو گئی، چوبیس کروڑ لوگ جو آپس میں گتھم گتھا تھے وہ ایک ہو گئے.
تجزیہ کار نوید حسین نے کہا کہ آج ایک اور جو انھوں نے نئی کہانی گھڑی اودھم پور کے اس ایئر بیس پر چلے گئے یہ دکھانے کیلیے کہ یہاں پر تو کچھ نہیں ہوا لیکن مزے کی بات یہ ہے کہ وہ چیزیں خود بخود آجاتی ہیں وہ S-400 جو ان کا میزائل سسٹم تھا اس کے لانچر کو بیک گرا?نڈ میں رکھ کر انھوں نے تصویر تو کھینچی لیکن مزے کی بات یہ ہے کہ لانچر کے پیچھے جو ریڈار سسٹم ہے، کمانڈ اینڈ کنٹرول سسٹم ہے، وہ کدھر ہے، دنیا تو دیکھ رہی ہے۔
تجزیہ کار عامر الیاس رانا نے کہا کہ ہم نے اپنے شہدا کے باقاعدہ اعلانات کیے، بتا دیا ان کے جنازے پڑھائے، پبلک میں پڑھائے، کوئی خفیہ کام نہیں ہوا وہ کہتے ہیں نہ کہ شہدا کے خون سے ہی خون رنگ لاتا ہے تو انقلاب آتا ہے، تو ہمارے ہاں انقلاب ان شہدا کی قربانیوں سے آیا ہم نے انڈیا کی منجی پیڑھی ٹھوک دی، دنیا نے مانا، جیسے ہمارے ڈی جی آئی ایس پی آر نے کہا تھا کہ جب ہم حملہ کریں گے تو دنیا بتائے گی، وہ وڈیوز ساری سامنے آ چکی ہوئی ہیں۔
سی این این، بی بی سی، فاکس کیا سکائی نیوز۔ جس کا نام لیں وہ سارے بتا رہے ہیں کہ کیا ہوا ہے،تجزیہ کار محمد الیاس نے کہا کہ مودی نے اب اپنی سروائیول کے لیے کوشش کرنی ہے اس نے اپنی عوام کو ہی بے وقوف بنانا ہے کہ اس کیلیے جگہ تنگ نہ ہوجائے بھارت میں، ظاہرہے اس کی ساری عوام تو ویسے ہی اس کے خلاف ہو گئی ہے، اب تو وہ بالکل چاہتے ہیں کہ سرکار کو چلے جانا چاہیے۔
